शिवप्रहार न्युज - पोलीस बनून लुबाडणारा श्रीरामपूरचा तोतया शिर्डीत पकडला….
Editor Chandu Aage 
पोलीस बनून लुबाडणारा श्रीरामपूरचा तोतया शिर्डीत पकडला….
शिर्डी/श्रीरामपूर- शिर्डीमध्ये भाविकांची फसवणूक करण्याचे अनेक प्रकार समोर आले आहेत.मात्र गेल्या काही दिवसांपासून पोलीस असल्याची बतावणी करून भक्त निवासमध्ये फिरत वृद्ध नागरिकांची फसणूक केली जात होती.त्याप्रकरणी श्रीरामपूरचा हा तोतया पोलीस शिर्डी पोलिसांच्या जाळ्यात अडकला आहे. पोलिसांनी त्याला ताब्यात घेत चौकशी केली असता त्याच्याविरुद्ध विविध पोलीस ठाण्यात 20 हून अधिक गुन्हे दाखल असल्याचे समोर आले आहे.शिर्डी पोलिसांनी सदरची कामगिरी केली आहे.
याबाबत अधिक माहिती अशी की, पोलीस असल्याची बतावणी करणारा एक इसम शिर्डीतील भक्त निवास परिसरात फिरत असल्याची माहिती पोलिस निरीक्षक रणजीत गलांडे यांना मिळाली. यानंतर ते पथकासह त्या ठिकाणी पोहोचले. पोलिस आल्याची चाहूल लागतच संबंधित व्यक्ती पळून जाण्याचा तयारीत होता. मात्र शिर्डी पोलिसांनी मोठ्या शिताफीने त्याला ताब्यात घेतले. जाकीर उर्फ जग्गू युसुफ खान (वय 30) असे पकडलेल्या तोतया पोलिसाचे नाव आहे.
तोतया पोलीस जाकीर हा वृद्ध नागरिकांना हेरायचा. यानंतर पोलिस अधिकारी असल्याची बतावणी करुन तपासणीच्या नावाखाली त्यांच्याकडील दागिने, पैसे लंपास करायचा.शिर्डीतील पाचशे रुम भक्त निवास परिसरात सावज शोधत असतानाच शिर्डी पोलिसांनी त्याला ताब्यात घेतले. पुढील एका गुन्ह्याच्या तपासासाठी आरोपीला लोणी पोलिसांच्या ताब्यात देण्यात आले आहे. पोलिस त्याची कसून चौकशी करत असून आणखी काही गुन्हे उघडकीस येण्याची शक्यता आहे.
श्रीरामपूर शहरातील जाकीर खान हा रहिवासी असून त्याच्यावर जिल्ह्यातील कोपरगाव आणि लोणी पोलिस ठाण्यासह राज्यातील विविध पोलिस ठाण्यात 20 हून अधिक गुन्हे दाखल असल्याचे पोलिस तपासात समोर आले आहे. आरोपी जाकीर खान याच्याकडे अनेक खोटी ओळखपत्र आणि विना नंबरची दुचाकी मिळून आली. तर त्याच्याकडे सहाय्यक पोलिस निरीक्षक अशोक पाटील नावाने खोटे ओळखपत्र मिळून आले आहे.
