शिवप्रहार न्युज - १० लाखांच्या घड्याळांसह स्थानिक गुन्हे शाखेने कुप्रसिध्द गँग पकडली...

१० लाखांच्या घड्याळांसह स्थानिक गुन्हे शाखेने कुप्रसिध्द गँग पकडली...

    अहिल्यानगर (शिवप्रहार न्युज)- कोपरगाव येथील सचिन वॉच दुकानातील घडयाळ चोरीचा गुन्हा उघडकीस आला असून बिहार राज्यातील घोडासहन येथील घडयाळ चोरीतील कुप्रसिध्द गँगला स्थानिक गुन्हे शाखेकडून अटक केली आहे. आरोपींकडून १० लाख ६२ हजार रू किंमतीचा मुद्देमालासह १०० महागडी घडयाळे जप्त केली आहे.

   याबाबत अधिक माहिती अशी की, फिर्यादी संजय लालचंद जैन, वय-६१, रा. गुरूद्वारा रोड, कोपरगाव, यांचे कोपरगाव शहरामध्ये सचिन वॉच कंपनी असे घडयाळाचे दुकान आहे. फिर्यादी हे दि. १८ एप्रिल रोजी रात्री दुकान बंद करून घरी गेले असता अज्ञात आरोपीतांनी त्यांचे दुकानाचे शटर उचकटून दुकानातील विविध कंपनीचे घडयाळे घरफोडी करून चोरून नेले होते. याबाबत कोपरगाव शहर पोलिसात गुन्हा दाखल करण्यात आला आहे. पोलीस अधिक्षक राकेश ओला यांनी स्थानिक गुन्हे शाखेस ना उघड घरफोडीच्या गुन्हयांचा समांतर तपास करून, गुन्हा उघडकीस आणणेबाबत आदेश दिल्यावरून एलसीबीचे पोनि. दिनेश आहेर यांनी पोलीस पथक तयार करुन सूचना करत रवाना केले.

    काल दि.३० एप्रिल रोजी हे पथक कोपरगाव, शहर पोलीस स्टेंशनमधील दाखल गुन्हयाचा तपास करत असताना सदरचा गुन्हा सुरेंद्र जयमंगल दास, रा. घोडासहन, बिहार व त्याचे इतर ७ साथीदारांनी केला असून ते सध्या शिरूर जि. पुणे परिसरात असल्याची माहिती प्राप्त झाली. पथकाने शिरूर जि.पुणे येथे संशयीतांचा शोध घेऊन सुरेंदर जयमंगल दास, वय-४० वर्षे, रियाज नईम अन्सारी, वय-४० वर्षे, पप्पु बिंदा गोस्वामी, वय-४४ वर्षे, राजकुमार चंदन साह, वय-२० वर्षे, राजुकुमार बिरा' प्रसाद, वय-४५ वर्षे, नईम मुन्ना देवान, वय-३० वर्षे, राहुलकुमार किशोरी प्रसाद, वय-२६ वर्षे गुलशनकुमार ब्रम्हानंद प्रसाद वय-२५ वर्षे, सर्व रा. घोडासहन, ता.घोडासहन, जि. मोतीहारी, राज्य बिहार असे मिळून आल्याने त्यांना ताब्यात घेतले.

   पथकाने त्यांच्याकडून ९ लाख ८१ हजार रू किं. त्यात टायटन, रागा टायटन, ट्रायमॅक्स कंपनीची १० घडयाळे, दोन वायफाय राऊटर, ७ मोबाईल असा एकुण १० लाख ६२ हजार रू. किंमतीचा मुद्देमाल हस्तगत केला आहे.

पथकाने ताब्यातील आरोपीकडे त्यांचेकडे मिळून आलेल्या मुद्देमालाबाबत विचारपूस करता आरोपी नामे सुरेंदर जयमंगल दास याने ताब्यात मिळून आलेली सर्व घड्याळे ही तो व त्याचे साथीदार अशांनी मोबीन देवान रा.घोडासहन, ता.घोडासहन, जि. मोतीहारी, बिहार राज्य (फरार) याचेसह मागील १२ - १३ दिवसापुर्वी कोपरगाव शहरातील एका घड्याळाचे शोरूममधून चोरी केले असून सदरची चोरी करताना त्यांचेकडील मोबाईल व राऊटरचा वापर केल्याची माहिती सांगीतली. तसेच गुन्हयातील इतर चोरी केलेल्या मुद्देमालाबाबत विचारपूस करता चोरीची काही घडयाळे ही मोबीन देवान याच्या मार्फतीने मुकेश शहा रा. घोडासहन, ता. घोडासहन, जि. मोतीहारी, राज्य बिहार (फरार) याला सदर घड्याळे हे चोरीचे आहेत हे सांगुन कमी किमतीत विक्री केले असुन काही घड्याळे मोबीन देवान याचेकडे असल्याची माहिती सांगीतली आहे.

   ताब्यातील आरोपीतांना विश्वासात घेऊन इतर गुन्हयांबाबत विचारपुस करता सुरेंदर जयमंगल दास याने त्याचे वरील साथीदारांनी मिळुन मागील १५ ते १६ दिवसापुर्वी छत्रपती संभाजीनगर शहरातील भटकलगेट परिसरात रात्रीचे वेळी मोबाईल शॉप फोडुन मोबाईल फोन चोरले आहेत. चोरी केलेले मोबाईल फोन हे नेपाळ देशात विक्री माहिती सांगीतली. नमूद माहितीची पडताळणी करून छत्रपती संभाजीनगर पोलीस आयुक्तालय येथील बेगमपुरा पोलिसात याबाबत गुन्हा दाखल असल्याची माहिती प्राप्त झाली आहे. ताब्यातील आरोपीतांना जप्त करण्यात आलेल्या मुद्देमालासह कोपरगाव शहर पोलीस स्टेशन येथे हजर करण्यात आले असून गुन्हयांचा पुढील तपास कोपरगाव शहर पोलीस स्टेशन हे करीत आहेत.

   सदरची कारवाई पोलीस अधीखक राकेश ओला, अपर पोलीस अधीक्षक वैभव कलुबर्मे, उपविभागीय पोलीस अधिकारी शिरीष वमने यांच्या सूचना व मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी केलेली आहे.