शिवप्रहार न्युज - जलजीवन योजनेच्या पाईपांना मोठी आग; श्रीरामपूर तालुक्यातील प्रकार...
Editor Chandu Aage 
जलजीवन योजनेच्या पाईपांना मोठी आग; श्रीरामपूर तालुक्यातील प्रकार...
श्रीरामपूर (शिवप्रहार न्युज)- श्रीरामपूर तालुक्यातील कडीत, मांडवे, फत्याबाद, कुरणपूर, गळनिंब येथे जलजीवन मिशन अंतर्गत पिण्यासाठी पाणीपुरवठा योजना सुरू असून या कामाचे पाईप मांडवे येथे ठेवलेले असताना या पाईपांना आज गुरूवारी दुपारी भीषण आग लागून लाखो रुपयांचे नुकसान झाले.
घटनास्थळी आगीची भीषणता मोठ्या प्रमाणात असल्याने प्रवरा कारखान्याच्या अग्निशमन दलाला आग आटोक्यात आणण्यासाठी पाचारण करण्यात आले. आगीच्या ठिकाणी शेजारीच शंभर दीडशे फूट अंतरावर असलेले नारळाचे झाडे देखील या भीषण आगीत पेटले. उष्ण वातावरण असल्याने धुराचा लोळ एवढा मोठ्या प्रमाणात होता की दोन अग्निशमन दल येऊन देखील आग आटोक्यात येत नव्हती.
सदर कामावरील सुपरवायझर यांच्या हलगर्जीपणामुळे ही आग लागली असल्याचे घटनास्थळी नागरिक बोलत होते. परिसरातील नागरिक आग आटोक्यात आणण्यासाठी शर्तीचे प्रयत्न करत होते. मात्र वातावरणातील उष्णता व आगीची तीव्रता मोठ्या प्रमाणात असल्याने आग आटोक्यात आणण्यास विलंब झाला. आगीमुळे सदर ठेकेदाराचे लाखो रुपयांचे नुकसान झाले आहे.
